“ACQUA DI CIELU” Poesia di Lorenzo.rm (postato da rosaria)

Acqua di cielu a Natali,

acqua di cielu, ma duci,

do’ gelu  a’ primavera,

do’ gelu o’ cauru, vidi?

Dìciunu tutti ca mai

‘n fenominu simili vinni.

Iù  ‘a videva ‘a missa

do’ Papa, e tutti i finestri

rapeva e l’aria traseva

e ‘u cori s’arrusbigghiava,

paci, amuri, amicizia

dava e sinteva, pigghiava

 e riciveva. Forsi ‘mprissioni

era o virità? Tuttu veru  era.

‘Nsumma, tardu mi cuccai

stanotti e pocu durmii.

Ma ‘stamatina ‘u me’ cori

sempri chinu m’u sentu

d’amuri, di paci, di perdonu,

di filicità. Aspettu parenti,

mi chiamunu amici o chiamu

e tutti i vuci  mi parrunu duci,

sì, duci comu ‘n cantu d’amuri.

‘U Bamminu  nascìu e purtau

i so’ doni. ‘U  Papa parrau

e dissi santi paroli. E tutti

ascutavunu e parevunu attenti.

Ca forsi putemu spirari daveru?

Daveru putemu essiri sulidali?

Parola ca ora quaccunu ripeti

ma iù na’ sapeva, ‘na vota.

Dicevunu bontà, fratellanza,

‘u prossimu. Cu’ era ‘u prossimu?

Tuttu era e nenti. Ognunu

pinsava ca c’era e non c’era,

e s’accuntintava di fari i so’ cosi.

Ma ora si parra e si parra.

Si dici e si dici “solidarietà”.

Cu’ st’aria  ‘i primavera

ca è duci ‘a missa ora vaiu.

Tanti frati e soru vogghiu

‘ncuntrari, tanti manu stringiri

‘n segnu di paci. Oggi, dumani

e sempri. Ca l’acqua di cielu

lava. Ca l’aria da’ primavera

astuta tutti i duluri e asciuga

tutti i passioni pessonali. Rapemu

‘u sipariu, scinnemu ‘na  strata,

taliamuni attornu e facemu

quaccosa, zoccu putemu facemu.

 Traduzione

Pioggia a Natale, pioggia ma dolce, dal gelo alla primavera, dal gelo al caldo, vedi? Dicono tutti che mai è accaduto un fenomeno simile. Io vedevo la messa del Papa e aprivo tutte le finestre, e l’aria entrava e il cuore si svegliava, pace, amore, amicizia davo e sentivo, prendevo e ricevevo. Forse era impressione o verità? Era tutto vero. Insomma sono andato a letto tardi questa notte e ho dormito poco. Ma stamattina mi sento sempre il cuore pieno d’amore, di pace, di perdono, di felicità. Aspetto parenti, mi chiamano amici o chiamo io, e tutte le voci mi sembrano dolci, sì, dolci come un canto d’amore. Il Bambino è nato e ha portato i suoi doni. Il Papa ha parlato e ha detto parole sante. E tutti ascoltavano e sembravano attenti. Forse possiamo sperare davvero? Davvero possiamo essere solidali? Una parola che ora qualcuno ripete ma io non la conoscevo una volta. Dicevano bontà, fratellanza, il “prossimo”. Chi era il prossimo? Era tutto e niente. Ognuno pensava che c’era e non c’era e si accontentava di fare le proprie cose. Ma ora si parla e si parla. Si dice e si dice “solidarietà”. Con quest’aria di primavera, che è dolce, ora vado a messa. Tanti fratelli e sorelle voglio incontrare, tante mani stringere in segno di pace. Oggi, domani e sempre. Perché la pioggia lava e l’aria di primavera spegne tutti i dolori e asciuga tutte le passioni personali. Apriamo il sipario (la finestra), scendiamo per strada, guardiamoci intorno e facciamo qualcosa, facciamo quello che possiamo.